Nesta vitrina puedes ver delles ferramientes y preseos de trabayu d’Antón.
A la izquierda atópase’l so caballete, sobre’l que reposa un cuadru al oliu d’un retratu ensin rematar d’una de les sos amigues: Graciela.
Al so llau, sobre’l taburete de madera decoráu por él mesmu, ta’l so maletu, colos pinceles, dellos tubos de pintura y la paleta onde entemecía los colores. A la so drecha, mira la mesa de madera, fabricada pol mesmu Antón y qu’usaba pa escribir, dibuxar o lleer. Dispuestos sobre ella, puedes ver unu de los cuadernos de dibuxos que facía mientres la so estancia na Escuela de Belles Artes de San Fernando de Madrid, asina como una serie de fueyes manuscrites, nes que fai alcordanza de la so estancia nesta ciudá. Al llau hai una figurina en bronce fecha pol escultor Juan Cristóbal, maestru d’Antón en Madrid.
L’arqueta de madera qu’hai sobre la mesa fíxola tamién Antón.
Na paré puedes ver los retratos a llápiz de trés de les sos cuatro hermanes, xunto col retratu d’una amiga d’elles, Rita, la primera pela izquierda, siguida de Benita, Josefa y Concha.
Na parte de la drecha, ta la mesa qu’Antón utilizaba cuando esculpía, sobre ella espónense les ferramientes qu’emplegaba pa modelar o tallar.
Has ver, sobre la mesa, el retratu a llápiz de so ma y la escultura de so güela, n’escayola, que darréu talló en madera y que vas poder atopar espuesta nesta sala.
Debaxo de la mesa hai una esbilla de revistes como “La Esfera”, “Blanco y Negro” o “Fotos”, espublizaciones que caltenía como fonte d’inspiración pa facer les sos obres.
