Antón domina a la perfección mesmo les numberoses técniques escultóriques, de la talla al modeláu, que los materiales qu’emplega pa facer les sos obres.
El material básico col que trabaya ye la escayola, por ser bono de modelar y porque dexa facer cambeos mientres entá permanez húmedo. Sicasí, por cuenta de la fraxilidá del material, les escultures feches n’escayola precisen el so treslláu a un material definitivo, más resistente. Como esto resultaba bien costoso p’Antón, namás puedo ellaborar la mayor parte de les sos obres n’escayola.
Fecha en bronce fundío alredor del 1932, esta escultura ye’l retratu d’un amigu d’Antón, cuando dambos taben en Madrid. Ye la única obra conocida hasta la fecha que foi fecha en bronce en vida por Antón, pues el restu de les que tán espuestes nesta sala fixéronse alredor del 1989, añu nel que s’inauguró esti muséu.
La obra ye un bustu fechu en madera de castañal qu’Antón fixo de la so propia güela, aprovechando’l tiempu que pasaba la vieya peles tardes dormida xunto al llar.
Nesta escultura, l’artista arrenuncia a cualesquier amuesa d’idealización p’afondar na vida interior del personaxe y dotalu d’una fuercia espresiva escepcional.
La obra creóse namás un añu dempués del so treslláu a Madrid, lo qu’amuesa la facilidá de deprendizaxe d’Antón na talla de madera, material col qu’enantes nun trabayara, una y bones les obres creaes n’años anteriores fixéreles n’escayola.
Nesti bustu fechu alredor del 1934, Antón retrata a la so prima Maruja, a quien consideraba la so musa. A Maruja llamábenla en Candás “La Greta”, polo que s’asemeyaba a la actriz sueca Greta Garbo.
La obra presenta distintos acabaos. Per una parte podemos ver una superficie rugosa na base de la escultura, de la qu’apruz un pescuezu pulíu y esllumante y una cara con facciones perfectamente definíes. Ye interesante destacar el trabayu del escultor a la de representar, con una minuciosa talla’l pelo de la muyer.
Esta escultura tien una execución impecable que reflexa’l dominiu del escultor na talla de la piedra.
