Antón inspiróse tamién nes tradiciones festives d’Asturies. Asina lo amuesen les escultures “Fin de la romería” y “Antroxu”, que puedes ver nesta sala.
Esta escultura, fundida en bronce a partir del modelu orixinal n’escayola, inspírase nun dibuxu d’Evaristo Valle, del qu’Antón fixera una copia n’acuarela nel añu 1929 y que puedes ver al llau.
“Fin de la romería” destaca pola facilidá cola que l’artista resuelve la composición piramidal, na que’l cuerpu del tamboriteru, de mayor pesu visual, caltién l’equilibriu que compensa l’enclín del gaiteru.
La obra reflexa aspectos folclóricos de la so tierra ya introduz na producción d’Antón esa nota risondera y burllona amestada a la identidá asturiana allegre y festiva.
Ésta ye una de les últimes escultures que fixo l’artista enantes del so prematuru fallecimientu. Repara na so firma y la fecha inscrites na base.
Nesta obra, fecha en bronce fundío a partir del modelu orixinal n’escayola que se caltién nel Muséu, Antón capta una tema folclórica de la so tierra, l’antroxu, que representa dos figures, un home amarutáu de muyer, y una muyer amarutada d’home.
Yera común na dómina que les persones recurrieren a les prendes de ropa que teníen per casa p’antroxar. Completaben el paxellu con mázcares pa tapecer la cara.
