Afáyate nel Centru d’Escultura de Candás, Muséu Antón. Propiedá del Conceyu de Carreño, el centru inxértase na rede de museos del Principáu d’Asturies al traviés d’un alcuerdu de collaboración permanente cola Conseyería de Cultura. Los sos oxetivos son el caltenimientu de les sos colecciones y l’estudiu, documentación, espardimientu, fomentu, investigación y pedagoxía de la escultura en toles sos manifestaciones y del arte en xeneral.
El Muséu Antón abrió les sos puertes al públicu’l 13 de xunetu del 1989, tres un procesu empecipiáu na década de los setenta del sieglu XX, cuando los heriedes del escultor candasín Antonio Rodríguez García, “Antón” establecíen negociaciones col Conceyu de Carreño pa qu’ésti recibiera en donación la obra del artista, que calteníen dende diba más de cuatro llustros.
Les instalaciones del Centru ocupen la casona de los Estrada-Nora, edificiu de finales del sieglu XVIII adquiríu pol Conceyu de Carreño nel 1983 pal usu cultural múltiple. Nel 1987 decide destinala namás a muséu.
L’edificiu ye de planta cuadrada y dos pisos. L’antepar acueye’l mostrador d’información. Nesta planta baxa allúguense trés sales d’esposiciones temporales, l’almacén xeneral y los servicios. Una escalera de madera arrinca dende l’antepar recibidor y remata nun corredor, yá na primer planta. La mayor parte de la superficie del primer pisu ocúpala una sala bien diáfana y lluminosa, destinada a la esposición permanente de la obra d’Antón.
Na segunda planta atópase la biblioteca, l’archivu y la oficina.
