Antonio Rodríguez García, conocíu más popularmente como “Antón”, ñaz en Candás, el 16 de febreru del 1911, dientro d’una familia humilde. Foi’l quintu de siete hermanos.
Yá de neñu amuesa una almirable disposición y maña pa tolo rellacionao col dibuxu y les manualidaes.
En terminando los sos estudios primarios, nel 1924, entama a ayudar a so pá en llabores d’albañilería. D’esti período de neñu y mozu consérvense numberosos dibuxos, pintures y escultures.
Col sofitu del pintor Evaristo Valle consigue respaldu económicu del industrial conserveru Alfonso Albo, lo que-y permite treslladase a Madrid, onde s’establez, nel 1931, pa empicipiar la so carrera artística na Escuela de Belles Artes de San Fernando.
Nel 1933 instala’l so propiu estudiu xunto al pintor uruguayu Alejandro Metallo. Namoráu de la so tierra y particularmente de la so villa natal, alterna les sos estancies na capital con otres n’Asturies.
Nel branu del 1936 sospriéndelu la guerra civil en Candás. Ye deteníu y encarceláu na Ilesia Parroquial, onde salva de la destrucción el so pervalible retablu churriguerescu.
Darréu, treslládenlu a un campu de trabayu en Murias de Candamu. Ellí muerre en mayu del 1937, cuando unu de los guardies encargaos de la so vixilancia-y pega un tiru ensin recibir nenguna orde y produciéndo-y la muerte.
Na so curtia trayectoria artística pueden señalase dos períodos. El primeru, del 1928 al 1930, correspuende con una etapa de formación autodidacta, na que trabaya empobinándose fundamentalmente pol so innegable instintu escultóricu y la so sensibilidá artística innata.
El segundu periodu entama nel 1931, cuando Antón va pa Madrid col envís d’empecipiar la so formación artística. Conclúi cuando muerre, nel 1937, con namás 26 años d’edá. Esta foi una fase bien abierta a les influencies esternes directes, como correspuende a la formación y a la información que recibió.
