Los motivos cotidianos y tamién les costumes fueron una fonte d’inspiración d’Antón pa facer les sos obres. Dientro d’esta temática de calter social tán espuestes na sala les escultures: “Asturiana” y “Rapacina”.
Nesta obra, fecha en bronce fundío a partir del modelu orixinal n’escayola que se caltién nel Muséu, Antón tomó como modelu a la so prima Maruja, a la que representa risondera y nun descansu de camín a la fonte.
Usa’l so vistíu como un recursu de gran plasticidá, nel qu’oldeen los perfiles nítidos y les superficies arrondiaes de la parte cimera del cuerpu al respective de la parte inferior, onde dominen los plegaos dispuestos rítmicamente en llinies paraleles y en ziszás.
Antón talla nesta escultura de madera a una moza que torna de garrar agua na fonte, llevando les típiques madreñes y la “ferrada”, el calderu de madera con aros de metal nel que se tresportaba l’agua. Estos dos elementos ponen en relieve’l calter popular de la representación. La so prima Maruja ye, otra vuelta, el so modelu.
Antón emplega la técnica de los paños moyaos, que dexen al espectador aldovinar l’anatomía de la retratada
Al pie de la escultura de madera espónse la fecha n’escayola, na que puedes ver como enantes d’ellaborar la obra nel material definitivo, nesti casu la madera, Antón plantegábala nun material que-y dexara faer correcciones y cambios, como yera’l casu de la escayola.
