Antón cultivó’l xéneru del retratu y foi bien prolíficu na creación d’esti tipu d’obres.
Nos sos retratos, llograba unes resultancies escultóriques bien cercanes a la realidá, mesmo no que se refier a l’anatomía como a les espresiones, pues captaba mesmo les traces físiques como les psicolóxiques de la persona retratada. Esto, de xuru tien que ver colos llazos afectivos comunes, pues los sos modelos yeren persones cercanes: familiares, amigos o vecinos que posaben pa él por iniciativa propia.
Nesta sala puedes almirar una variedá d’obres d’esta temática, bien diverses nel so plantegamientu compositivu.
Fecha en bronce fundío a partir del modelu orixinal n’escayola que se caltién nel Muséu, Antón retrata a Oscar de mediu cuerpu, con camisa y la cara xirada escontra la drecha, cola mirada baxa espresando un ciertu aire de señaldá.
Como puedes ver, na esquina inferior izquierda ta la fecha y la firma del autor
Nesta obra, fecha en bronce fundío a partir del modelu orixinal n’escayola que caltién el Muséu, Antón retrata a Cuca Aja, sobrina del so amigu Jesús Aja, cuando ésta tenía dos años.
La escultura presenta una composición bien ornamental pola mor del peñáu de marcaos tirabuzones y tamién polos volantes del vistíu que lleva Cuca.
En “Primavera”, escultura en bronce fundío a partir del modelu orixinal n’escayola que se caltién nel Muséu, Antón retrata a Encarnación Rodríguez Fernández, más conocida en Candás como “Ción”. Pa titular la so obra inspírase na so fecha de nacencia, en marzu, mes nel qu’entama la primavera, de la que fai alcordanza con un ramu roses, tamién como ufrienda a la retratada.
La escultura ta trabayada per aciu formes arrondiaes, que remarquen la inocente espresividá de la retratada.
Na base de la obra puedes ver la firma del autor y la fecha na que se fixo. Y nel centru, el títulu de la obra.
Fecha en bronce fundío a partir del modelu orixinal n’escayola que se caltién nel Muséu, “Arrapiezo dormido” ye’l retratu de Remigio Serrano Rodríguez, vecín de Candás y amigu d’Oscar, a quien, tal como cuntaba’l mesmu retratáu, diba ver posar p’Antón. Un día, Remigio ufiérta-y posar tamién a él, pero l’artista nun podía paga-y, asina que llegaron a un alcuerdu según el cual, Antón llevaríalu a recostines dende La Formiga hasta’l muelle, ¡tolos díes!.
Esta escultura marca l’entamu de la formación artística d’Antón nel 1930. Con 19 años, presentó esta obra nel V Certame Provincial de Trabayu na llocalidá asturiana de La Felguera, onde consiguió’l primer premiu y espertó l’interés del pintor Evaristo Valle, quien formaba parte del xuráu del certame.
Al conocer la so falta de medios económicos pa siguir colos sos estudios, Valle contacta col industrial conserveru Alfonso Albo, que tenía una fábrica en Candás, pa que financiara los estudios artísticos del escultor en Madrid.
Na base de la obra puedes ver la firma del autor y la fecha na que se fixo.
